Гісторыя школы – гэта гісторыя перамог і дасягненняў яе педагоў і навучэнцаў. Гісторыя, якую павінен ведаць кожны, хто выйшаў у вялікае жыццё з яе сцен.
Ад людзей, якія наведваюць нашу ўстанову адукацыі, не раз можна пачуць пытаннне: “А чаму Суткаўская? Размешчана ж школа ў вёсцы Войкава.” А справа ў тым, што першапачаткова школа знаходзілася ў вёсцы Суткі.
Суткаўская школа пачала прыём дзяцей у пачатковыя класы ў 1927/1928 навучальным годзе. Яна размяшчалася ў хаце высланага кулака Рамановіча. Восенню 1931 года быў адкрыты пяты клас,паступова школа стала сямігадовай. З першых дзён работы сямігадовай школы тут настаўнічала А.А.Брычкоўская, якая пазней стала яе першым дырэктарам.
У 1933/1934 навучальным годзе адбыўся першы выпуск Суткаўскай сямігодкі.
У гады Вялікай Айчыннай вайны вёска Суткі амаль уся была спалена (засталіся толькі дзве хаты). Згарэў і будынак Суткаўскай сямігодкі. Тэрыторыю акупіравалі фашысты. Навучанне дзяцей было спынена.
Сваю дзейнасць школа ўзнавіла ў 1944 годзе пасля вызвалення тэрыторыі ад фашыстаў. Пад школу прыстасавалі дзве хаты ў вёсцы Чашын, якая знаходзілася недалёка ад Сутак. Класы былі вялікія, па 40-45 вучняў. Дзеці ў класах былі рознага ўзросту, розніца часам дасягала да 3-4 гадоў.
Цяжкі гэта быў перыяд: не хапала паперы, падручнікаў не было наогул. Замест чарніла выкарыстоўвалі фарбу для тканіны, сажу, пісалі на газетах (паміж радкамі), кусках шпалераў.
У пасляваенны час непадалёку адвёскі Суткі (цяпер вёска Гарадок) пачалі будаваць новую школу, бо сюды “сцягвалі”хаты з хутароў. Пад школу было прыстасавана некалькі будынкаў, і адкрылася яна ў 1947 годзе. Спачатку была сямігодовай, пасля – васьмігадовай. Першым дырэктарам стаў Канстанцін Пятровіч Трус.
З 1964 года Суткаўская школа набыла статус сярэдняй. Узначаліў яе Уладзімір Вячаслававіч Ваўчэцкі, які 20 гадоў заставаўся нязменным яе кіраўніком.
У 1985 годзе дырэктарам становіцца Аляксандр Аляксандравіч Паклонскі.
1989 год – закладваецца падмурак новага будынка школы, а 10 лістапада 1990 года новая школа на чале з новым дырэктарам Казючыцам Уладзімірам Яўгенавічам прымае сваіх выхаванцаў.
У 2004 годзе школа стала школай-садам. З 2004 года па 2010 год дырэктарам Суткаўскай сярэдняй школы-сада з’яўлялася Тарасевіч Ганна Міхайлаўна.
У 2010 годзе дырэктарам прызначана Бандарэнка Таццяна Уладзіміраўна, якая і цяпер ўзначальвае ўстанову адукацыі. 
З 2011 года Суткаўская сярэдняя школа стала вучэбна-педагагічным комплексам.
Рашэннем Уздзенскага раённага выканаўчага камітэта ад 24.10.2014 № 1981дзяржаўная ўстанова адукацыі “Вучэбна-педагагічны комплекс Суткаўскі дзіцячы сад-сярэдняя школа” рэарганізавана ў дзяржаўную ўстанову адукацыі “Суткаўскі вучэбна-педагагічны комплекс дзіцячы сад-базавая школа”.
